Samtak
Tað eru fleiri orsøkir og endamál við Samtak. Samtak vendir sær fyrst og fremst til limirnar, men eisini almenningin sum heild, og virkar fyri, at umstøðurnar hjá limum í fakfeløgum fáa størri rúmd í almenna rúminum.
Samtak er kunningaramboð, har fólk eitt nú kunna leita sær vitan um sáttmálar, rættindi sum heild, um lógir og um ymisk evni, ið eru tengd at arbeiðslívinum.
Samtak setur t.d. sjóneykuna á ALS, javnstøðu, lutfalsligt fátækradømi, arbeiðsmarknaðarlógir og trygd á arbeiðsplássum á landi og sjógvi. Samtak stuðlar undir verandi virksemi hjá limafeløgunum, og virkar í høvuðsheitum á yvirskipaðum stigi.
Feløgini í Samtak hava tilsamans knapt 6000 limir. Samtak ber fram tíðindi og sjónarmið, ger hoyringsskriv og varpar ljós á serlig evni, sum eru viðkomandi fyri limirnar.
Orsøkir til Samtak
Tað er tørvur á kunning til limirnar um sáttmálarnar og rættindi sum heild
Tað er tørvur at varpa ljós á ymisk viðurskifti á arbeiðsmarknaðinum úr sjónarhorninum hjá løntakarunum
Fakfeløg í Føroyum skulu seta dagsskránna í arbeiðsmarknaðar viðurskiftum
Tørvur er á øktum samstarvi millum fakfeløgini
Fakfeløg hava hvør í sínum lagi ov lítla orku at taka upp evni og viðgera tey út í æsir
Hvat er Samtak?
Samtak er samstarv millum Føroya Arbeiðarafelag, Føroya Fiskimannafelag, Klaksvíkar Arbeiðsmannafelag og Klaksvíkar Arbeiðskvinnufelag.
Samstarvið millum feløgini verður gjørt sjónligt í einum livandi arbeiðsmarknaðar portali
Ætlanin við Samtak?
Samtak skal kunna limirnar um rættindi teirra og arbeiðsmarknaðar viðurskifti sum heild
Samtak skal økja tilvitskuna um arbeiðsmarknaðin úr sjónarhorni løntakaranna
Viðurskifti hjá limunum í Samtak skulu hava størri rúmd í almenna rúminum
Samtak skal hjálpa fakfeløgunum at betra um korini hjá limum sínum
Samtak portalurin verður eitt kunningar amboð fyri limir, fjølmiðlar og almenningin yvirhøvur
Samtak fer hvørja viku at bera tíðindi og sjónarmið frá fakfeløgunum
Samtak skal taka viðkomandi evni upp og lýsa tey út í æsir
Samtak fer at fylgja væl við í tí sum fyriferst í almenna rúminum
Samtak fer at gera tilmæli til politiska landslagi um ymiskar lógir, ið eru viðkomandi fyri limirnar
Samtak miðjar ímóti at fáa formligt samstarv við politiska landslagið og arbeiðsgevararnar/reiðararnar
